童年時溜過2

我老豆對我好唔好﹖一個單身麻甩佬帶住個塞豆窿﹖你想會有幾好﹖真係想對你好的，有咁既能力咩﹖報上報導有老母將孖女叫人睇住，睇到周身傷幾乎死咁濟，我都算執身彩咯﹖因為我記得老豆都不下一次將我交畀人代養，那時我都只係五/六歲左右，係無人理定係我個人不受理﹖唔知﹖餓就無餓親我，因為我記得都未試過話餓都無得食既記憶，但係在人家度住，住到我對腳生到好厚既好似牛皮咁，都唔知點解會咁，好似話因為成年都唔沖涼先會攪成咁喎﹖係唔係咁呢﹖寄人籬下﹖細佬仔唔肯沖涼，又係人地個仔，屋主都唔好夾硬嚟，怕都係咁啩﹖而且今日，助養過我既姓乜名乜都唔記得，你話會係同我老豆有幾老友丫﹖怕且係人地見我老豆一個大男人，當做善事幫你帶下仔等你好畀心機搵銀矣，大家都係窮人，以前的人真係有人情味好多架！細個有乜大病過﹖有，試過一病大半年，成個學期無返學，瞓係人地閣仔，住既都係人地屋企，落樓就係往屯門睇中醫，返到嚟就係飲葯。有過一次，我老豆都試過包左的田地自耕，搭左間木尞，都叫做自己屋自己竇丫，個次晚黑我嘔到唔識停，個時真係諗過無話叫十字車入院架，老豆淨係識話灌鹽水，食成葯，最後出到個人珍藏(煙膽)灌我食，真係苦到似一米粒濃縮十碗二十四味既丸子，若然粒丸無效怕我老豆以後真係會活得舒暢好多咯(因為救唔返我丫嘛)，可惜丫，粒丸又真係幾有效喎，食完瞓醒第二天無事咯，當時都唔知係唔係醉左﹖講到病，就記得咁多乍，講到玩同玩具﹖邊有丫，但係我有過既怕且今日既細佬，尤其係香港出生過的，都米使旨意會有得玩同有得見咯﹖個時村落都有好多山澗小溪，好多小魚，久不久就會見一種彩麗魚，外型好似縮水珠仔魚，全身彩色，約身長4CM /濶2CM /咁上下，真係好靚，今日呢的魚仔，幾十年無見過咯，捉金龜、捉甲虫、雙角甲虫個時香港的村落都有架，仲有就捉豹父，今日有幾多人會知係乜，係好廋身既蜘蛛，前雙腳好長，好多男仔捉嚟對打，只要呢的蜘蛛一碰埋就打架喇，打蟋蟀反而少喎，捉蟋蟀就有，山上即摘可以食既有，山棯、酸葉、我又見有人燒黃蜂竇食蜂蛹，燒竹樹食竹蛹，呢的生物我就無食過喇，因為覺得核突，有一次同住既戶主個仔直接在雞籠內拎起雞所生既蛋，篤穿個窿就咁啜嚟食喎，屋主仲拎一隻畀我叫我試下，我啜左一啖，嘩，腥到嘔，真係米攪！家下想起，1963/4年在校期間被歉凌媿乎係不爭事實，都係高年班杰伯，原因﹖怕係我自己過渡活湧躍啩﹖想返起，我又真係無同過邊個家少主人有乜沖突喎，反而跟住我上山下海既就唔少，或者，我老豆無人再請佢打工﹖又會唔會同我有關呢﹖係學校我無零用錢就奉旨咯，但又試過有少主人將佢既兩毫子零用畀一毫我喎﹖我又唔拘喎，又試過突然小賣部一名同學捉住我話﹕你昨日潛到既獎品未攞喎﹖吓﹖有咁既事咩﹖乜我有錢潛野咩﹖你話丫，有咁多花臣，又點會無乜回億丫﹖(3/5)